"Chele isle, si est apielee « tournoians » par droite raison, car il est verités ke ele tournoie, mais pour chou ke la maniere de son tournoiement n’est pas bien conute de tous chiaus et de toutes cheles qui parler en ont oï, pour chou est il raisons ke chis contes en demostranche la verité, car dont seroit chou uns enlachemens de paroles, se il de chascune doutanche dont il parleroit ne moustroit aperte connissanche, autresi come font une maniere de gent qui dient maintes paroles et les vauroient affermer a voir et si n’en pueent traire avant nul tesmoignage, fors ke tant seulement que dire l’ont oï as autres gens ; mais de cheste mauvaise maniere s’escuse bien chis contes, car n’entrait onques avant nule parole ou il puisse doutanche aperchevoir ke il ne le fache de tout en tout apertement counoistre ; et pour chou est il a droit apielés l’Estoire des estoires. Or repaire la parole a raconter la droite maniere de l’isle […]. Il est verités provee ke au commenchement de toutes choses […]" (p. 249, § 401).
Estoire del saint Graal manuscrit du XVe siècle, BNF fr. 113
